Indi magnubo sa 40 ka mga tawo ang napilasan, samtang tatlo naman ang prefectures matapos nga ang bagyo Shanshan nag-landfall sa Southwestern main island sang Kyushu sa Japan.
Naghingyo naman ang Japan Meteorological Agency sa mga pumuluyo sa apektado nga mga lugar nga magpabilin nga alerto para sa natural nga mga kalamidad, samtang ang mga operator sang pampubliko nga transportasyon nagkanselar sang mga tren kag mga flight, kag ang pila ka mga puluy-an nabilin nga wala sang kuryente.
Bangud man sa bagyo, ang pagkatublag sa mga serbisyo sa transportasyon naglapta, rason nga ang Central Japan Railway nagpahayag nga pauntaton sini ang mga serbisyo sang Tokaido Shinkansen bullet train sa tunga sang Mishima kag Nagoya sa sentral nga Japan, kon sa diin ang linya nagaangot sang Tokyo pakadto sa Osaka sa nakatundan nga Japan.
Ang Kyushu Railway, nga nagsuspender na sang bahin sang ila operasyon sang shinkansen bullet train sang Miyerkules sang gab-i, nagsiling nga ang pag-untat sini magalakip sang tanan nga high-speed kag iban pa nga serbisyo sang tren sa isla, samtang ang Japan Airlines kag All Nippon Airways nagkanselar man sang mga flight pakadto kag pabalik sa mga airport sa rehiyon.
Nagpaguwa man sang datus ang Nippon Telegraph kag Telephone West Corp. nga kapin 254,000 ka mga puluy-an sa pito ka mga prefecture sang rehiyon sang Kyushu ang wala sang kuryente.
Gintumod man sang Kyushu Electric Power Co., nga ang nagdugang nga numero mahimo pa nga magtaas.
Nahibaluan nga ang pila ka mga landline sa Kagoshima kag Miyazaki prefectures nagkalautod man.
