ILOILO CITY — Gin-athag sang Iloilo Provincial Government nga 40% lamang ka consolidated public utility vehicles (PUV) halin sa first town municipalities ang makasulod sa Iloilo City sugod buwas nga adlaw, Mayo 31, 2024.
Ini kasunod man sang pag-apruba ni Iloilo City Mayor Jerry Treñas sang letter nga ginpasa ni Iloilo Governor Arthur Defensor Jr. nga nagahingyo nga pahanugutan makasulod ang mga consolidated units sang probinsya.
Sa interview sang Bombo Radyo kay Mr. Mario Nillos, head sang Provincial Planning and Development Office (PPDO), iya ginpahayag nga 40% ang pasudlon sa peak hours, sugod las-6:00 sa aga tubtob las-9:00 sa aga kag las-4:30 sa hapon tubtob las-6:30 sa gab-i.
Samtang 25% naman ang pasudlon sa kada ruta sa oras sang off-pick, sugod las-10:00 sa aga tubtob las-4:00 sa hapon.
Suno kay Nillos, indi na magbutang sang mga buffer units ukon standby units sa tagsa ka mga terminal.
Ginpahayag man sini nga ang plano ang ginalakipan sang Iloilo City Traffic Management Unit (ICTMU) kag Land Transportation Franchising and Regulatory Board (LTFRB).
Santo sa data sang PPDO, yara sa 21 sa kabug-usan nga 53 ka mga units sang Pavia Via Aquino Avenue nga ruta ang makasulod sa syudad; samtang 21 naman sa kapin 52 ka units sang Pavia – Iloilo City via La Paz route.
Ang Iloilo City – Leganes via Aquino Ave nga ruta ang mahimo makapasulod sang 94 ka units, 23 naman sa Iloilo City – Leganes Via La Paz route, 16 ka mga units sang Iloilo City – Oton Derecho, kag 49 ka mga units sang Iloilo City – Oton -Anhawan.
