Pag-angkon sang maximum tolerance ukon malawig nga pasensya ang nagakadapat para sa mga katapo sang kapulisan sa mga operation bangud may yara sila sang position of power.
Sa interview sang Bombo Radyo kay Atty. Joenar Pueblo, iya ginpahayag nga kaangot sa natabo sa pulis nga nagpatay sa mag-iloy Paniqui, Tarclac, wala sang pasensya nga ginluthang sang isa ka police personnel ang mga biktima.
Ang ginatumod nga mga biktima amo sanday Sonya Gregorio, 52 nga amo ang iloy kag anak sini nga si Frank Anthony Gregorio, 25, residente sang Barangay Cabayaoasan, Paniqui, Tarlac.
Samtang ang nangluthang naman nga pulis amo si Police Senior Master Sgt. Jonel Nuezca, naka-destino sa Parañaque City Crime laboratory unit.
Suno kay Atty. Pueblo, wala sang hustisya ang gin-obra ni Nuezca ilabi na nga pulis siya kag may katungdanan nga magserbe kag magprotekta sa mga pumuluyo.
Pahayag ni Atty. Pueblo, wala man sang ebidensya nga may threat sa kabuhi ni Nuezca sa insidente gani makabig nga personal nga desisyon ang iya pagpatay sa mag-iloy.
Si Nuezca ang nagapangatubang sang kaso kriminal nga double murder kag kaso administratibo.
Ginpaathag ni Atty. Pueblo nga ang murder ang may yara sang motibo sang suspek angay sang reward, pagpangawat, plano ukon hungod kag may cruelty kag inhumane nga pagpatay sa tawo.
Magadangat 40 ka-tuig to death nga pagkapreso suno sa abogado ang penalidad nga atubangon ni Nuezca.
Matandaan nga napun-an man sang kasubo ang lubong sang mag-iloy sa diin gintambongan sang ginatos ka mga tawo sa Paniqui Garden of Angels Memorial Park.
