Wala naganubo sa 41 ka mga kabataan nga lalaki ang ginbawian sang kabuhi matapos magpaidalom sa traditional circumcision kaangot sang ila initiation rites ukon seremonya sa South Africa.
Ini nga mga insidente ang natabo halin Nobyembre tubtob Disyembre 2025. Ang amo nga tradisyon ang padayon nga ginapatuman sang pila ka ethnic groups sa Africa, ilabi na sa Xhosa, Ndebele, Sotho, kag Venda.
Sa amo nga ritwal, ginadala ang mga kabataan sa mga initiation schools agud matudluan sang tradisyon, mga prinsipyo, kag mga obligasyon bilang mga yara na sa insakto nga pang-edaron.
Bangud sa mga nagluntad nga kamatayon, ginpatuman sang Gobyerno sang South Africa ang mga layi nga nagapangayo nga marehistro ang tanan nga initiation schools.
Suno kay Velenkosini Hlabisa, Minister of Traditional Affairs sang South Africa, ang 41 ka napatay sa summer initiation sang tuig 2025 ang resulta sang kapabayaan sang pila ka initiation schools lakip na ang mga rehistrado.
Ginpahayag man ni Hlabisa nga madamo ang mga sala nga mga pagpati sa pungdsod ilabi na sa mga etniko nga grupo, kaangay sang indi pag-inom sang tubig bangud ginapatihan nga indi ini makapadasig sang pag-ayo sang pilas.
Dugang pa niya, 41 na man ka persona ang gindakop sang mga awtoridad sa mga illegal initiation schools amo man sa mga ginikanan nga nagsumiter sang sala nga edad sang ila kabataan agud makapaidalom na sa ritwal.
Base sa layi sang South Africa, ang mga kabataan nga 16-anyos pasaka lamang ang ginatugutan nga magpaidalom sa initiation schools.
