ILOILO – Gilayon nga ipaidalom sa Polymerase Chain Reaction Test ang magapauli nga Overseas Filipino Workers buwas nga adlaw, Mayo 9, antes dal-on sa quarantine facility sa nagakalain-lain nga banwa sa probinsya sang Iloilo.
Sa interview sang Bombo Radyo kay Iloilo Gov. Arthur Defensor Jr., iya ginpahayag nga ang pagpaidalom sa PCR test ang isa sa protocol nga dapat matuman agud nga masigurado nga indi carrier sang virus ang mga magapauli nga Overseas Filipino Worker.
Suno kay Defensor, kun may yara sang magasugat nga ambulance sa mga Overseas Filipino Workers, sila ang temporaryo nga magatinir sa ginhanda nga quarantine facility sa tagsa ka Local Government Unit.
Sa tion nga may Local Government Unit nga indi pa handa nga magbaton, ang repatriates ang pagadal-on anay sa pinakamalapit nga quarantine facility tubtub nga may yara na sang resulta sa ila PCR test.
Ang mga nagnegatibo sa PCR test suno kay Defensor ang mahimo na nga makapauli sa ila tagsa ka balay.
