Maga-deploy ang Philippine National Police (PNP) sang masobra 41,000 police officers sa bilog nga pungsod bilang kabahin sang Ligtas Paskuhan Deployment Plan para sa Simbang Gabi 2024 ukon Misa de Gallo.
Suno kay PNP spokesperson Brigadier General Jean Fajardo, magapabilin ang deployment sa siyam ka adlaw nga Simbang Gabi nga magasugod sa Disyembre 16 kag magatakop sa Christmas eve.
May yara man sang pagatukuron nga police assistance desks malapit sa mga simbahan kag transportation hubs para nga ma-assist ang publiko.
Suno kay Fajardo, maga-collaborate man ang PNP sa local government units para nga ma-kontrol ang trapiko kag ang mga tawo.
Samtang, nagpangabay naman si Cardinal Pablo Virgilio “Ambo” David sa mga pari nga maghatag sang makahulugan nga homiliya sa misa samtang nagapadulong ang Paskuwa. Tion ini nga nagapamati gid ang mga tawo suno kay David gani nga dapat preparado gid ang pari kun ano ang ila ihambal sa misa.
“Ang paanyaya ko lang sa lahat ng kaparian, please prepare naman your homilies,” suno sa cardinal. “Ito yung panahon na talagang nakikinig ang mga tao, they are captive audiences. They would really like to hear the Word of God.”
Sang weekend lang nagbalik si David sa Pilipinas matapos nga ginpasaka ni Pope Francis ang iya ranggo bilang cardinal. Siya ang ika-10 nga Filipino priest nga nakaangkon sang amo nga ranggo nga pangaduha na sa Santo Papa basi sa Catholic church hierarchy.#
