Pilason ang isa ka babaye matapos ginsumbag sang lalaki nga wala makilal-an sa sulod sang isa ka jeep sa Iloilo City Proper subong nga gab-i, Hulyo 24.
Ang biktima amo si Alyas Nene, 43-anyos, residente sang Barotac Nuevo, Iloilo kag isa ka sidewalk vendor sa downtown area.
Sa interview sang Bombo Radyo sa pakaisa ni Nene, iya ginpahayag nga pauli na ini kuntani sa Brgy. San Isidro, Jaro matapos ang ila nga pagbaligya.
Samtang nagasakay sa jeep, hinali lang ini ginsumbag sang lalaki sa mata nga wala man sang rason. Pagkatapos, nagpanaog kag nagdalagan ang lalaki sa direksyon sang E.Lopez St., Jaro.
Gilayon naman nga nag-responde ang Iloilo City Emergency Response (ICER) team agud nga madapatan sang pagbulong ang biktima.
Nagapadayon man ang pagpangita sang kapulisan sa nasambit nga lalaki. Nakasuksok ini sang orange nga t-shirt, naka-shorts, naka-tsinelas kag naka-backpack.#
(Article: Bombo Hanna Andasa)
