GUIMARAS – Depression ang ginalantaw rason sang paghikog sang isa ka 43-anyos nga lalaki sa Brgy. Salvacion, Nueva Valencia, Guimaras.
Ang biktima amo si Rolly Gallego, residente sang Brgy. Lanipe sa amo man nga banwa.
Sa interview sang Bombo Radyo kay Police Corporal Demcent Villa, imbestigador sang Nueva Valencia Municipal Police Station, iya ginpahayag nga nagbitay sa sanga sang kahoy nga lumboy ang nasambit nga biktima.
Ang lugar kun diin natabo ang insidente amo man ang lugar kun diin masami nga nagahigot ang biktima sang ila hinuptanan nga baka kag kanding.
Suno kay Villa, base sa panaysayon sang pamilya sang biktima, antes pa man natabo ang pagpanginmatay, masami nga naga-reklamo ang biktima bangud wala ini sang trabaho bangud man sang ginasuprer nga hubag sa paa.
Suno sa imbestigador, daw kaangay nga nagbatyag sang kaluoy sa kaugalingon ang biktima.
Kumbinsido man ang pamilya nga hikog ang natabo amo nga indi na pag-ipaidalom sa autopsy examination ang bangkay sang nasambit nga biktima.
