Nagdangat sa 45 ka mga Chinese aircraft ang nagpalapit sa Taiwan sa sulod sang isa lamang ka adlaw.
Ini ang pinakamataas nga numero sang aircraft sang Beijing nga na-monitor sang isla subong nga tuig, magluwas pa sa 14 ka warships nga nasiplatan malapit man sa Taipei.
Ginkumpirma ini sang Taiwan defense ministry matapos gin-anunsyo nga nagpatigayon ang China sang combat drill lakip ang aircraft kag warship kag “live-fire exercises” sa kalayuon nga 40 nautical miles (74 kilometres) halin sa south sang Taiwan.
Ginlaragway naman ini sang Taipei nga tuman ka makatalagam kag isa ka paglapas sa international norms.
Sunod naman nga ginbali sang China ang pahayag sang Taiwan kag nagdepensa nga isa lamang ka “routine training” ang ila nga ginhimo.
Sang Martes, matandaan nga nadakpan man sang Taiwan ang cargo chip sang China nga gina-suspetsahan nga nagapang-utod sang subsea telecoms cable nga ginagamit sa Penghu island group sang Taipei. Ginakabalak-an sang Taiwan ini nga tikang sang China sa pagpang-utod sang communication links bangud posible nga padayunon ini sa tuyo nga sakupon ang teritoryo.
Nahibaluan nga isa man ang Taiwan sa nagapasaka sang tension sa tunga sang US kag China, bangud ang US amo ang pinakadaku kag pinakaimportante nga backer kag arms supplier sang Taiwan.
Apang sa Cabinet meeting sa Estados Unidos, nagpamalibad na si US President Donald Trump nga magkomento kun tugutan sang US ang China nga kontrolon ang Taiwan paagi sa paggamit sang pwersa. Suno kay Trump, indi siya magkomento diri kag indi niya luyag ibutang ang iya kaugalingon sa amo nga posisyon.
Ginsiling sini nga maayo ang iya relasyon kay Chinese President Xi Jinping kag padayon nga gina-abi-abi sang Washington ang maayo nga relasyon sa Beijing. Apang pahayag sini, bisan gusto sang US ang mayo nga relasyon sa China, indi siya magpasugot nga hingalitan sila kaangay sang ginhimo anay kay former President Joe Biden.
