I-extend pa sang Iloilo City Government ang suspensyon sang implementasyon sang Local Public Transport Route Plan (LPTRP) agud maghatag-ligwa sa proseso sa pag-amyendar sini kag sa posible dugang pa nga mga konsultasyon.
Sandig sa Executive Order No. 1 – Series of 2022 ni Iloilo City Mayor Jerry Treñas, matapos kuntani ang 45 nga adlaw nga supensyon sang LPTRP sa Agosto 22, apang nadesisyunan sang alkalde nga palawigon ang suspensyon sa dugang nga 45 ka adlaw.
Sa interview sang Bombo Radyo kay Iloilo City Councilor Atty. Sedfrey Cabaluna, chairman sang Committee on Transportation, iya ginpahayag nga dala na diri sa 45 ka adlaw ang paghatag sang revised LPTRP sa Department of Transportation (DOTr) kag pagbalik sini sa Iloilo City Council para sa amendment.
Natapos na sang syudad ang inisyal target sang konsultasyon kag buwas, Agosto 16, magasapol ang city government sa Iloilo Provincial Government para sa paghinun-anon bangud may yara man sang LPTRP ang probinsya.
Pagkatapos sini, trabahuon sang technical working committee ang pag-consolidate sa mga suhestyon nga natipon halin sa stakeholders kag sa riding public. I-presentar ini sang technical working group sa Transport Summit nga patigayunon naman sa Agosto 30.
Ginalantaw nga sa una ukon ikaduha nga semana sang Septyembre, mapasa na ang revised LPTRP sa DOTr, kag amo sunod ang igabalik sa konseho.
Apisar nagtakop na ang initial nga target sang konsultasyon sa publiko, bukas gihapon ang city government nga makig-istorya suno kay Cabaluna kun may dugang pa nga sentimyento nga ipabati ang iban pa nga stakeholders.
Ginpahayag man sini nga indi pagbuhinan ang 7 ka bag-o kag 17 ka rationalized nga mga ruta sa syudad sang Iloilo, apang may yara sang himuon nga modifications.
Matandaan nga epektibo Hulyo 8 sang ginsuspinde ang pagpatuman sang LPTRP bangud sang wala-tuo nga reklamo sang riding public, drivers, kag iban pa nga apektado nga sektor sang ginlain na ang mga ruta.
