Kabug-usan nga 480 ka mga Pilipino ang nakatalana nga magapauli sa Pilipinas paagi sa chartered flight halin sa Fujairah, United Arab Emirates pakadto sa Manila subong nga adlaw sang Sabado, Marso 14.
Ang nasambit nga flight ginpatigayon sang gobyerno sang Pilipinas sa pagpakig-coordinate kay John Rio, Labor Attaché sang Department of Migrant Workers (DMW), kag kay Ambrosio Brian Enciso, Consul General sang Philippine Consulate General sa Dubai.
Sa kabilugan nga numero, 274 ka mga Overseas Filipino Workers (OFWs) kag ang ila nga mga dependent ang ginhanda para sa repatration sang Department of Migrant Workers.
Samtang, 195 naman ka mga stranded nga mga Pilipino ang ginbuligan sang Philippine Consulate sa UAE.
Lima ka kaso naman sang repatration ang gina-angutan sang mga indibidwal nga may ara sang medical condition nga nagakinahanglan sang bulig.
Nagabinuligay naman ang mga Filipino organization sa United Arab Emirates sa pagpahibalo kag pagtipon sang mga Pilipino nga nagakinahanglan sang repatriation.
Personal naman nga nakigkita si DMW Secretary Hans Cacdac sa mga lider sang Filipino community agud mapahayag ang iya pagpasalamat sa ila nga operasyon kag suporta sa pagbulig sa mga naapektuhan nga mga Pilipino.
Ginpasiguro naman sang mga DMW nga padayunon sang gobyerno ang repatration efforts paagi sa commercial ukon chartered flights.
Samtang, padayon naman nga bukas ang Philippine Consulate General sa Dubai kag mga opisina sang DMW sa Dubai kun sa diin may ara man sang mga ini sang hotline nga handa maghatag sang impormasyon kag bulig sa mga Pilipino nga apektado sang krisis sa rehiyon.
