Nagdangat sa P591.8 billion ang ginpain nga pondo para sa cash assistance ukon ayuda programs sang gobyerno para sa pigado nga mga pamilya sa idalom sang proposed 2025 national budget.
Suno kay Department of Budget and Management (DBM) Secretary Amenah Pangandaman, sa sini nga kantidad, ang conditional cash transfer program nga Pantawid Pamilyang Pilipino Program ukon 4Ps amo ang may pinakadaku nga budget nga nagadangat sa P114.2 billion.
Lakip man sa sini nga pondo amo ang Assistance to Individuals in Crisis Situation, TUPAD (Tulong Pang-hanapbuhay sa Ating Disadvantaged/Displaced Workers), ang free tertiary education, kag Sustainable Livelihood Program sa idalom sang Department of Social Welfare and Development.
Apang suno sa ahensya, ang Ayuda para sa Kapos ang Kita Program or AKAP sang DSWD ang wala na nalakip sa 2025 National Expenditure Program.
Ini nga AKAP cash aid program nga nagahatag sang one-time P5,000-aid sa pamilya nga may income nga P23,000 ang wala na gin-request sang DSWD sa ila budget proposal para sa 2025.
Apang nagpahayag naman si Senate Minority Leader Koko Pimentel nga wala man sang request para sa AKAP sang 2024 apang napangitaan man sang paagi kag nakasulod gihapon sa national budget subong nga 2024.
Ginpasigurado naman ni Senate committee on finance chairperson Grace Poe kay Senator Pimentel nga wala na sang matabo nga insigida nga insertions ukon isal-ot lang nga mga pondo kadungan sang bicameral conference.
Sang Pebrero, matandaan nga ginsiling ni DSWD Secretary Rex Gatchalian nga wala sang bisan isa ka sentimo sa P26.7-billion nga AKAP budget sa 2024 nga nagasto sa tunga sang mga alegasyon nga gingamit ang kuwarta agud nga baklon ang mga pirma para sa people’s initiative nga ginduso para sa Charter change.
