Wala sang dapat kakulbaan ang mga benepisyaryo sang Pantawid Pamilyang Pilipino Program (4Ps) kun may mga nagapamahog nga kakason sila sa listahan kun indi magboto sa partikular nga kandidato sa 2022 elections.
Paathag sang Department of Social Welfare and Development (DSWD), ang ahensya lang ang may gahum nga maka-kakas sa 4Ps household gikan sa programa kag may yara pa sang ginalantaw nga mga basehan.
Sa interview sang Bombo Radyo kay May Castillo, spokesperson sang DSWD Region VI, iya ginpahayag nga wala man sang labot pati ang punong barangay bangud ang pangalan sang mga 4PS beneficiaries ang yara na nga daan sa existing database.
Lakip sa mga grounds nga pwede makakas sa 4Ps list amo ini: kun wala ginasunod ang health conditions; kun wala ginapa-eskwela ang bata ukon masami nga absent; kag kun sige-sige ang pag-prenda sa cash card.
May dugang pa nga mga paandam ang DSWD samtang nagahilapit ang eleksyon.
Paagi sa Memorandum Circular (MC) No. 9 nga gin-isyu sang ahensya agud nga makudalan ang mga programa sang DSWD batok sa mga manug-gamit nga mga kandidato, ginsaad nga pwede ireport sa otoridad kun may nga pulitiko nga nagamensyonar sang bisan ano nga programa sang DSWD sa ila nga campaign speeches ukon strategies.
Pwede man ma-report kun ang pulitiko ang nagabutang sang iya nga pangalan sa relief items; kun gina-repack ang relief goods kag kun ginapanagtag ang goods kag ginapa-guwa nga ila ini kaugalingon nga supplies; kag kun gina-claim sang pulitiko nga ang DSWD goods kag programs ang napanagtag ukon napatuman bangud sa impluwensya sang partikular nga pulitiko ukon kandidato. ##
