ILOILO CITY- Posible madala sa listahan sang mga mahimo makabatun sang assistance sa Social Amelioration Program ang mga nalakip sa family roster sang Pantawid Pamilya Pilipino Program.
Sa interview sang Bombo Radyo kay Department of Social Welfare and Development Office Region 6 Director Maria Evelyn Macapobre, iya ginpahayag nga mahimo na makapalista kag posible nga makabatun sang cash assistance nagikan sa SAP, apang gin-athag niya nga indi automatic ang pagbatun sini cash aid.
Suno kay Macapobre, may yara sang lima ka kondisyon agud malakip ang mga ini sa makabatun sang cash aid.
Ang mga masunod ang kondisyon nga kinahanglan sundon: (1) Nagakadapat nga indi kana katapo sang 4PS (2) Nakaseparar na sa pamilya sini nga benipesyaryo sang 4Ps (3) Indi na benipesyaryo ukon wala na nagabatun sang cash assistance sang 4P’s (4) Duha na ka bulan nga separado sa iya pamilya nga katapo sang 4Ps (5) dapat move out na ang iya status.
Pahayag pa ni Macapobre, sa bahin sang move out status, (1) kinahanglan nga mavalidate kag makapangayo sang certification sa punong barangay nga nakaseparar na ini sa pamilya nga miyembro (2) Mismo ang grantee ang magahimo sang deklarasyon nga wala na ga estar sa ila balay ang mangin benipesyaryo sang SAP (3) kun masunod na ang mga pagsulundan, mismo ang punong barangay ang magapasa talatapan sang 4Ps sang listahan agud makapatigayun man sang validation ang DSWD.
