Suportado ni 4th District Board Member Rolando Distura ang ordinansa nga ginaduso ni Senator Erwin Tulfo nga nagatuyo nga isulod sa basic education curriculum ang pagtudlo nahanungod sa West Philippine Sea (WPS).
Sa nahibaluan, si Distura ang principal sponsor sang “Iloilo Local Ordinance Anchored on Values Education of the West Philippine Sea” ukon (I LOVE WPS), nga napasar na sa probinsya sang Iloilo agud itudlo sa mga eskwelahan ang ihibalo nahanungod sa soberanya sang Pilipinas sa WPS.
Gin-sponsoran man ini ni 3rd District Board Member Jason Gonzales nga amo ang chairman sang Committee on Education.
Sa interview sang Bombo Radyo kay BM Distura, iya ginpahayag nga nalipay gid siya sa ginaduso nga ordinansa ni Senator Tulfo nga pagtudlo sa mga estudyante sa public schools nahanungod sa WPS, nga kaangay man sa tinutuyo sang ordinansa nga iya ginpangunahan sa probinsya.
Dugang pa ni Distura, magamay pa lamang ang kaalam sang kabataan may kaangtanan sa WPS kag madamo ang nagalapta nga sala nga impormasyon sa social media.
Gani, dako ini nga bulig sa pagpabakod sang soberanya sang Pilipinas paagi sa pagpasiguro nga ang mga Pilipino, labi na ang kabataan, may husto nga ihibalo parte sa sini nga isyu.
Nagapati man si Distura sa diplomasiya kag wala sini ginakabig nga kaaway ang China, apang suno sa iya, ang tuyo lamang amo ang pagpangapin sang teritoryo sang Pilipinas kag pagsiguro nga may husto nga ihibalo ang mga kabataan sa amo nga diskusyon.
Sa karon, nagpasalig si Distura nga masuguran na sa sini nga school year ang pagtudlo sang amo nga leksyon sa kada eskwelahan sa probinsya sang Iloilo.
.){kind=link}