Padayon pa nga gina-usisa sang National Bureau of Investigation (NBI) kun may kaangtanan ang lima sini ka nadakpan nga Chinese nationals sa ginaalegar Chinese spy nga si Deng Yuanqing nga una na naaresto sa nagligad nga semana.
Sa report sang ahensya, sa Palawan kag sa Manila nila nadakpan ang lima.
Sa Palawan, gin-alegar nga nag-set up pa ang mga suspek sang closed circuit television cameras nga naga-atubang sa dagat. Gin-alegar nga isa sa ila ang nagkuha pa sang video sang mga barko sang Philippine Coast Guard (PCG) nga ginapatihan nga parte sang ila aktibidad sa pagpang-espiya.
Suno kay Assistant Director General Jonathan Malaya sang National Security Council (NSC), nagpakuno-kuno pa ang duha sa mga suspek nga mga turista sila halin sa Taiwan.
Matandaan nga si Deng Yuanqing nga naaresto subong man nga bulan sa Makati ang ginaalegar nga produkto sang isa ka eskwelahan nga ginapadalagan mismo sang Chinese military.
Gin-alegar nga nagpang-espiya ini sa police and military camps, airports and seaports, kag iban pa nga vital infrastructure diri sa Pilipinas.
Pahayag sang NSC, indi anay nila masapubliko ang tanan nga detalye sa kaso sini, apang nagpasalig nga mabakod ang ila nga mga ebidensya batok sa nasambit nga alleged spy.
