ILOILO CITY – Nagakadapat nga tun-an anay sang Kongreso ang kagustuhan ni Presidente Rodrigo Duterte nga palawigon ang Martial Law sa Mindanao tubtob sa Disyembre subong nga tuig.
Sa interview sang Bombo Radyo Iloilo, ginpahayag sang political analyst nga si Ramon Casiple nga dapat ikonsiderar sang Kongreso ang mangin epekto sa Mindanao kag sa bug-os nga pungsod sang pagpalawig sang Batas Militar.
Kun basehan suno kay Casiple ang pahayag sang militar nga ila na nakontrol ang Marawi City, indi na kinahanglan pa nga palawigon sang lima ka bulan ang Martial Law.
Suno kay Casiple, sa karon indi pa makita ang epekto sang Martial Law sa turismo kag ekonomiya apang kun magdugay, mabatyagan na ini.
Gin-athag naman sang political analyst nga indi mahambal nga kahinaan sa Duterte administration ang pagpalawig sang Batas Militar sa Mindanao.