Temporaryo nga ginsuspende ang byahe sang lima ka mga fiber glass boat nga may ruta halin sa Jordan Wharf – Iloilo City and vice versa.
Sa exclusive interview sang Bombo Radyo kay Lt. Junior Grade Lady Deann Cantores, Philippine Coast Guard- Guimaras Station Commander, iya ginpahayag nga sa pito ka fiber glass boat, ginpauntat anay ang byahe sang lima matapos gintumod sang Maritime Industry Authority (MARINA) nga expired ang permit to operate sang amo nga mga sakayang pandagat.
Suno kay Cantores, gin-abisuhan na ang pila ka mga nagahulat nga pasahero sa Jordan Wharf nga sa Roll-on/roll-off (RoRo) vessel na lang anay magsakay agud indi madelay ang ila pagbyahe.
Dugang pa niya, indi man madugay ang pagpa-renew sang permit sang lima ka fiber glass boat rason nga wala sang dapat kabalak-an ang pumuluyo.
