Lima ka tawo, lakip ang isa ka bata, ang napatay pagkatapos nga ang isa ka salakyan nag-arado sa kadam-an sang mga tawo sa isa ka Christmas market sa Magdeburg, Germany.
Ini ang ginalaragway man sang mga lokal nga opisyales nga isa ka pag-atake sang terorismo.
Sa interview sang Bombo Radyo kay Bombo Aimee Andaya Hilger, Bombo International Correspondent in Germany, iya ginpahayag nga kapin sa 200 ka tawo ang napilasan sa pag-atake, nga may 40 nga yara sa kritikal nga kondisyon.
Suno kay Hilger, gin-aresto sang mga pulis ang isa ka 50-anyos nga doktor gikan sa Saudi Arabia nga ila ginapatihan nga responsable sa pag-atake, suno man sa ila German state premier.
Ginpahayag man sini nga isa ka Saudi source nagsiling nga ang Saudi Arabia nagpaandam sa mga awtoridad sang amo nga pungsog nahanungod sa nag-atake pagkatapos nga nag-post siya sang mga extremist nga mga pahayag sa iya personal nga X account nga nagapamahog sang kalinong kag seguridad.
Ginlaragway sang mga opisyal sa pungsod nga makamamatay ang pag-atake sa Magdeburg kag isa ka “makatalagam nga buhat”.
Ginpabutyag man sini nga wala na sang mas malinong kag masinadyahon nga lugar sang sa isa ka Christmas market, sa diin ang mga tawo nagakadto upod ila mga abyan kag pamilya agud mag-enjoy sang gluhwein ukon wine kag magpangita sang pila ka pagpamalandong kag kalipay.
Nagsindi naman sang mga kandila kag nagbutang sang mga bulak sa guwa sang isa ka simbahan malapit sa merkado ang mga nagpakita sang ila kasubo sa natabo nga insidente.
