Lima ang kumpirmado nga patay sa pagkatumba sang mini dump truck sa Sitio San Juan, Barangay Guimbalaon, Silay City.
Sa initial investigation sang Silay City Police Station, pito ka iban pa ang kritikal ang kondisyon kag 13 naman ang nag-angkon sang minor injury.
Sakay sa nasambitan nga dump truck ang 24 ka mga Job Order casuals gikan sa Silay City Government nga nagpatigayon sang tree planting activity sa Sitio Patag sa nasambit nga siyudad.
Suno kay Lina Andrade, Job Order Casual kag asawa sang isa sa mga nasamaran, sa pagpasaka pa lamang sa lugar sang aga, nagabisyo na ang mini dump truck.
Suno diri, makapila magpatay- patay ang makina sang salakyan, gani may pila nga mga sakay ang naglumpat, apang nagbalik man sang makasaka na sa ibabaw.
Pahayag sini nauna ang mini dump truck sa pagpauli kag sila ang wala pa makahalin sa tree planting site sang ginpahibalo tuhoy sa aksidente.
Tuman naman ang kakugmat sini bangod sakay sa nasambitan nga salakyan ang iya bana nga si Aaron Andrade, street cleaner sang ciudad.
Wala naman natam-an ang iya bana kag nag-angkon lamang sang minor injuries.
