Nagdangat sa lima ka tawo ang kumpirmado nga napatay kag malapit 100 ang nasamaran bangud sa buhawi nga naglaslas sa probinsya sang Shangdong nga nahamtang sa eastern China.
Sa syudad sang Heze, naglaslas ang buhawi kahapon sang hapon lakip na sa area sang Dongming kag Juancheng kun sa diin napilasan ang 88 ka mga tawo.
Malapit man sa 3,000 ka balay ang naguba; 48 power supply lines kag masobra 4,000 hectares sang pananum ang nahalitan.
Suno sa Dongming County Emergency Management Bureau, nag-establisar na ang local government sang command center kag naglunsar man sang emergency response operations. Naga-conduct na subong ang emergency services sang “post-disaster disposal and on site clean-up.”
Suno naman sa China Weather News nga ginapadalagan sang China Meteorological Administration, masami gid man nga ma-eksperyensyahan ang kaangay sini nga mga buhawi sa southern kag coastal provinces sang China kaangay sang Guangdong kag Jiangsu.
Sa sini nga bulan, matandaan nga nagbalhag ang China Meteorological Administration sang ila tuigan nga Blue Book sa state of climate change sa pungsod kun sa diin nagguwa ang report na-eksperyensyahan sang pungsod ang pinakamainit nga tyempo halin sang 1901 kag nagpaandam man nga mahimo masami paabuton ang extreme weather” kag “climate events.”
