Lima ang napatay lakip na ang suspek kasunod sang pagpangluthang sa sulod sang isa ka eskwelahan sa Wisconsin sa Estados Unidos sang Amerika.
Natabo ini sa Abundant Life Christian School sa Madison nga capital sang state kag ginabanta apat ka kilometros ang kalayuon halin sa police training centre.
Suno kay Madison City police chief Shon Barnes, sang nag-abot ang pulis sa area, patay na nga daan ang suspek. Wala pa sang ginhatag nga dugang nga detalye apang ginapatihan nga ang shooter ang estudyante man anay sang amo nga eskwelahan.
Base pa sa Madison Police Department, magluwas sa mga napatay, may lima ka iban pa nga pilason — minor tubtub critical — kag subong yara na sa ospital. Namensyonar nga may mga estudyante kag staff members nga posible nakaangkon sang fatal injuries.
“Multiple injuries have been reported. This remains an active and ongoing investigation. More information will be released as it is available,” suno sa incident report sang pulis.
Nagapadayon pa ang secondary searches sa building kag sa mga salakyan kag gin-abisuhan ang mga tawo nga indi anay magpalapit sa area.
Ang Abundant Life Christian School isa ka K-12 school kun sa diin ginabanta may 390 students suno sa ila nga website.
Natabo ang insidente isa ka semana antes ang pormal nga pagtakop sang klase para sa Christmas vacation.
