ILOILO – Nakabaton sang ayuda gikan sa Iloilo Provincial Government ang 5 ka rebelde nga nagbalik sa sabak sang gobyerno.
Ang mga rebelde ang naghalin sa banwa sang Calinog kag Lambunao sa diin mismo si Iloilo Governor Arthur Defensor Jr. ang nagpanguna sa paghatag sang financial assistance.
Yara man ang presensya ni 301st Brigade Philippine Army Commander Col. Marion Sison kag Department of the Interior and Local Government-Iloilo Provincial Director Teodora Sumagaysay.
Sa interview sang Bombo Radyo kay Sison, iya ginpahayag nga ang tagsa ka rebel returnee ang nagbaton sang P15,000 nga immediate assistance kag P60,000 nga livelihood assistance sa idalom sang Enhanced Comprehensive Local Integration Program (E-CLIP).
Suno kay Sison, bangud nga ginsungka man sang mga rebel returnee ang ila armas, sila ang makabaton man sang tag P70,000.
Ginpahayag ni Sison nga lakip sa mga ginsungka nga armas amo ang duha ka .38 caliber pistol, isa ka .45 caliber pistol, isa ka shotgun kag isa ka M1 grenade rifle.
Ang mga rebel returnee ang anay naangot sa Communist Party of the Philippines-New People’s Army kun sa diin may 10 ka rebelde nga nanuna nga nagsungka sang nagligad nga tuig.
Ang Department of Social Welfare and Development naman ang in-charge sang monitoring tuhoy sa livelihood projects sang mga rebelde.
May kaangtanan diri, may yara sang kabug-usan nga 184 ka rebelde sa probinsya sang Iloilo ang yara sa monitoring sang Philippine army.
