ILOILO CITY – Lima tubtub anum ka mga persons of interest ang gina-imbestigaran sang otoridad sa kamatayon sang 90 anyos nga retired teacher sa Brgy. Tacas, Jaro, Iloilo City.
Sa interview sang Bombo Radyo kay Police Captain Eduardo Siacon, hepe sang Jaro Police Station, iya ginpahayag nga pagpangawat ang nagapanguna nga motibo sa pagpatay kay Rosa Argel.
Suno kay Siacon, magluwas sa kwarta, gina-usisa man kun bala ano nga mga kagamitan sang biktima ang nagkalaguba.
Ginpahayag ni Siacon nga posible nga kilala ni Argel ang suspek bangud nga wala sang forcible entry sa balay sang biktima.
Sa subong, gina-usisa na ang tanan nga kuha sang Closed Circuit Television sa lugar agud nga mahibalu-an kun sin-o ang nagpatay sa biktima.
Samtang, makapila ka beses nga ginlampusan sa ulo ang biktima nga si Argel.
Sa interview sang Bombo Radyo kay Dr. Joe Martin Fuentes, medico legal officer sang Scene of the Crime Operatives 6, iya ginpahayag nga paglampos sa ulo ang ginkamatay sang biktima.
Santo sa autopsy examination, nakita nga may pilas kag hematoma sa ulo ang biktima nga posible tuga sang paglampus sang matig-a nga butang.
