Nag-update ang Vatican nga 130 foreign delegations ang magatambong sa lubong ni Pope Francis lakip na ang 50 ka heads of state kag 10 ka reigning monarchs.
“There are currently 130 delegations confirmed for the funeral of Pope Francis,” suno sa Vatican.
Sa Sabado ang lubong sang Santo Papa, alas kuatro sa hapon oras sa Pilipinas.
Suno kay Matteo Bruni, director sang Holy See Press Office, 61,000 na ka mga tawo ang nagpadulong sa St. Peter’s Basilica halin sang Myerkules sang aga agud nga maghatag sang pagtahod kay Pope Francis.
Kun malubong na ang 88-anyos nga Pope, may patigayunon nga pagpangamuyo sa Rosaryo sa atubang sang Basilica of St. Mary Major sa alas nueve sang gab-i.
Sa separado nga post sang Holy See website, ginsiling nga nadesisyunan naman kun sin-o ang maga-deliver sang duha ka pre-conclave meditations.
Base sa nakasugtan sang 113 Cardinals nga yara sa Roma para sa ikatatlo nga General Congregation, si Cardinal Víctor Manuel Fernández ang manguna sa misa sa ikaanum nga adlaw sang Novemdiales sa baylo nga si Cardinal Kevin Farrell.
Sa pihak nga bahin, si Fr. Donato Ogliari, O.S.B., Abbot of St. Paul Outside the Walls, ang maga-deliver sang first meditation sa Lunes, kag si Cardinal Raniero Cantalamessa, Preacher Emeritus of the Papal Household, ang magadul-ong sang second meditation sa pagbukas sang conclave.
Wala pa sang petsa nga nakasugtan kun san-o magasugod ang eleksyon para sa masunod nga Santo Papa.#
