ILOILO- Mahimo nga ma-dismiss sa serbisyo ang kapin 50 ka mga pulis lakip na ang duha ka mga hepe nga naaktuhan ni Iloilo Police Provincial Office director Police Colonel Roland Vilela nga wala sa ila posts samtang naka-full alert status angot sa nationwide transport strike kahapon.
Sa interview sang Bombo Radyo kay Vilela, iya ginpahayag nga sa tion nga mapaslawan nga makahatag sang konkrekto nga sabat kag paathag ang nasambit nga mga pulis, mahimo sila pasakaan sang abandoning of post.
Kun indi naman mapatihan ang ila sabat kag mapamatud-an nga nagabinutig, mahimo sila pasakaan sang dishonesty kag magaresulta sa dismissal sa serbisyo santo sa Civil Service Rules.
Lakip sa mga pulis nga mahimo madismiss amo sanday Police Major Niño Leonard Amar, hepe sang Pavia Municipal Police Station nga naabtan nga wala sa iya post kag Police Lieutenant Joebert Amado, hepe sang Cabatuan Municipal Police Station nga naka-leave apisar ginadumilian ang pagleave sa tion nga naka full-alert status ang kapulisan.
Sa data sang Iloilo Police Provincial Office, sa 50 ka mga pulis nga naaktuhan nga wala sa ila post, 11 diri ang gikan sa San Miguel Municipal Police Station, siyam sa Maasin Municipal Police Station, siyam sa Cabatuan Municipal Police Station, lima sa Oton Municipal Police Station kag 16 ang halin sa Pavia Municipal Police Station.
Suno kay Vilela, napadal-an na sang memorandum ang nasambit nga mga pulis kag ginhatagan sila sang 24 oras nga makapaathag agud indi pagdagdagan sang sanction.
Itugyan naman ni Vilela sa Investigation and Detective Management Division ukon S7 sa Iloilo Police Provincial Office ang pag-imbestigar sa natungdan nga mga pulis.
Nahibaluan nga ginpadulungan ni Vilela ang nasambit nga mga police stations bangud napaslawan ang mga ini nga magpasa sang report tuhoy sa sitwasyon sa ila area may kaangtanan sa transport strike.
