Nagapadayon ang pag-atake sang Israel sa Gaza sa pihak sang international nga panawagan nga untaton ang giyera.
Sa pinakaulihi nga balita halin sa mga otoridad sa Gaza, naglab-ot na sa 50 ka mga Palestino ang napatay sang Martes bangud sa Israeli air strikes.
Ginbomba sang Israel ang duha ka panimalay, diin may kababainhan kag kabataan nga napatay, lakip ang eskwelahan nga temporaryo nga ginaestaran sang mga evacuees.
Natabo ang mga atake sa Khan Younis kag sa iban pa nga lugar sa norte sang Gaza, lakip na ang Deir al-Balah, Nuseirat, Jabalia, kag Gaza City.
Wala pa sang opisyal nga pahayag ang Israel Defense Forces (IDF) matapos sini nga mga atake.
Sa sulod sang walo ka adlaw, kapin 500 na ka tawo ang napatay sa Gaza bangud sang mabaskog nga opensiba sang Israel.
Madumduman nga ang giyera ang nagsugod pa sang Oktubre 7, 2023, kag subong yara na sa ikaduha ka tuig, kag nagadalom pa gid ang tensyon sa tunga sang duha ka pungsod.
