ILOILO CITY- Hilway nga maka-apelar ang masobra 50 ka mga empleyado sang Iloilo City Hall nga nalakip sa listahan sang ginpa-recall sang Civil Service Commission bangud sa kwestionable nga appointment kag promosyon sa ila sang tion sang daan nga administrasyon.
Sa interview sang Bombo Radyo kay Iloilo City Mayor Jerry Treñas, iya ginpahayag nga makapangayo pa sang reconsideration ang nasambit nga mga empleyado sa Civil Service Commission bangud indi man final kag executory ang pagpa-recall sang nasambit nga komisyon.
Suno kay Treñas,magluwas sa 53 ka mga empleyado, may 23 ka iban pa nga ginapaidalom sa review sang technical committee kag posible man nga ipa-recall.
Apang gin-athag ni Treñas nga sa tion nga magdesisyon ang Civil Service Commission nga ideklarar nga null and void ang ila promosyon kag appointment, mahimo sa gihapon magtrabaho ang nasambit nga mga empleyado apang ibalik sila sa ila daan nga mga posisyon.
Matandaan nga natukiban nga wala nag-agi sa nagakaigo nga proseso ang appointment kag promotion sa nasambit nga mga empleyado sang Disyembre 2018 tubot Marso subong nga tuig sang panahon sang administrasyon ni anay Mayor Jose Espinosa III.
