Nagdangat sa 50 ka mga Palestinian ang nagkalamatay sa bag-o nga pagpang-atake sang Israel kasunod sang pagbiya ni US Secretary of State Antony Blinken sa Middle East agud kuntani iplastar ang ginaduso sang Estados Unidos nga ceasefire sa Gaza war.
Suno sa Israeli military, gin-igu sang ila jets ang 30 ka mga target sa Gaza Strip lakip na ang tunnels, launch sites, kag isa ka observation post.
Ginpahayag sini nga napatay nila ang dinosena ka armado nga mga hangaway kag nakumpiskar ang mga hinganiban kaangay sang bomba, granada, kag automatic rifles.
Kasunod sina, gin-igu man sang militar ang isa ka eskwelahan kag isa ka balay sa Gaza City kun sa diin tatlo ang napatay kag 15 ang nasamadan suno sa Civil Emergency Service.
Ginrason sang Israel nga naga-operate ang Hamas militants sa command center nga yara sa compound.
Padayon sini nga ginaakusaran ang militante nga grupo nga naga-operate sa mga pasilidad sang mga sibilyan apang ginapanginwala naman ini sang dominant Islamist militant group sa Gaza.
Wala gihapon sang kasiguruhan subong ang estado sang ceasefire apisar nga ini na ang ika-siyam ka bes nga ginpabalik si Blinken sa Middle East sa tuyo nga indi na magsaka pa ang tension sa amo nga rehiyon nga subong 40,000 na ang nagkalamatay bangud sa gyera nga nagsugod ang Oktubre 2023.
