ILOILO CITY – 50% pa lang sang mga barangay sa syudad sang Iloilo ang nakapasa sang Bi-monthly report sa City Department of Interior and Local Government may kaangtanan sa road clearing operations.
Sa interview sang Bombo Radyo kay City Department of Interior and Local Government Officer Roy Defiño, iya ginpahayag nga katunga pa lang sang 180 ka mga barangay ang nakapasa sang Bi-monthly report kasunod sang ginpaguwa nga mandu sang ahensya lakip na ni Iloilo City Mayor Jerry Treñas.
Suno kay Defiño, nalakip man sa report nga ginapapasa sa tagsa ka barangay council ang mga laragway nga makapamatuod nga ginapatuman ang Oplan Hawan sa tagsa ka barangay.
Ginpahayag ni Defiño nga iya ipatawag ang mga barangay official agud nga mapaathag ang kaundan sang bag-o nga form nga dapat sundon sa pagpasa sang Bi-monthly report.
Bangud nga nakakuha sang medium compliance ang syudad sang Iloilo, ginpahayag sang natungdan nga handum ni Mayor Treñas nga makakuha sang mataas nga grado sa re-evaluation sang Oplan Hawan.
Ang mga barangay official nga indi magsunod sa Oplan Hawan suno kay Defiño ang pasakaan sang administrative charges.
