ILOILO CITY – Ginturn-over sang opisina ni Iloilo City Lone District Representative Julienne ‘Jamjam’ Baronda sa Liga ng mga Barangay ang 54 ka tonelada sang frozen fish nga ipanagtag sa mga barangay sa syudad sang Iloilo, Agosto 24.
Sa interview sang Bombo Radyo kay Baronda, iya ginpahayag nga ini nga suplay sang isda ang pormal man nga gintugyan sang Office of the Civil Defense (OCD) sa iya talatapan.
Nagalaum si Baronda nga makapiyan-piyan ang amo nga suplay sa kinahanglanon sang mga pigado nga pumuluyo sa syudad subong nga may coronavirus disease 2019 (COVID-19) pandemic.
Sa iya naman nga mga kritiko nga nagapahayag nga counterfeited lang ang amo nga isda, ginpahayag ni Baronda nga safe ang isda bangud nag-agi ini sa OCD sang gin-ship halin sa Manila.
Normal lang suno kay Baronda ang pagpakamalaot nga ginahaboy sang iya mga kaaway sa politika.
