Tubtub sa 500 overseas Filipino workers ang ginalauman nga makapauli halin sa Lebanon sa masunod nga tatlo ukon apat ka adlaw.
Suno sa Department of Migrant Workers (DMW), sa sini nga numero, 254 na ang naka-book sang ila flights pabalik sa Pilipinas.
Pahayag ni Secretary Hans Cacdac, nakakuha na ini nga mga Pinoy sang exit clearances halin sa Lebanese government apang amat-amat lang ang ila pagbalik sa pungsod.
Sa subong, 178 pa sa ila ang nagatinir sa mga shelter sa Lebanon nga ginapadalagan sang gobyerno sang Pilipinas.
Halin sang ginpatuman ang repatriation sang nagligad nga tuig, 460 na ka OFWs kag 28 ka dependents ang napapauli halin sa Lebanon agud nga makalikaw sa gyera sa Middle East.
Level 3 gihapon ang status sa amo nga pungsod ukon may ginapatuman nga voluntary repatriation.
Nagahulat sa ila diri sa Pilipinas ang bulig sang gobyerno lakip ang P150,000 sa financial aid magluwas pa sa medical, training kag iban pa nga kinahanglanon nga assistance.
