ILOILO CITY – Anay drug surrenderee ang 51 anyos nga lalaki nga ginluthang-patay sa sulod mismo sang iya balay sa Brgy. Sto. Niño Sur, Arevalo, Iloilo City.
Ini ang ginkumpirma sa Bombo Radyo ni Barangay Kagawad Joemarie Millano sang nasambit nga lugar.
Suno kay Millano, sang 2017 sang nakatapos sa drug rehabilitation ang biktima nga si Luduvico Araneta.
Pagkatapos sadto, ginpahayag ni Millano nga wala na naangot sa illegal drugs ang biktima.
Sa pagkamatuod suno kay Millano, ang isa man ka anay drug surrenderee nga kaupod ni Araneta ang isa na ka barangay tanod sa subong.
Antes pa man naka-istar sa Brgy. Sto. Niño Sur, ang biktima ang anay residente sang Yulo Drive sa distrito man sang Arevalo.
Suno sa Brgy. Tanod nga si Joemar Galanto, kaupod niya sadto nga nagpaidalom sa drug rehabilitation ang biktima nga si Araneta.
Ginpahayag ni Galanto nga nagkilalahay sila ni Araneta paagi sa pagserbe sa isa ka simbahan bilang drug surrenderee.
Apisar sini, wala na sang ideya ang natungdan may kaangtanan sa aktibidad sang biktima.
