ILOILO CITY – Ginsulod sa balay kag ginluthang ang isa ka lalaki sa Brgy. Sto. Niño Sur, Arevalo, Iloilo City.
Ang biktima amo si Ludovico Araneta alyas Tato, 51 anyos.
Sa interview sang Bombo Radyo sa asawa sang biktima, iya ginpahayag nga nagahigda kag nagahampang lang sang cellphone ang biktima sa sulod sang ila kwarto sang nagsulod ang duha ka suspek nga nagasuksok sang helmet kag mask.
Madamo ang lupok nga nabatian sang asawa kag suno sa iya, siya mismo ang gintayaan man sang pusil sang mga suspek.
Wala sang ideya ang asawa kun ngaa ginluthang sang mga mga lalaki ang iya bana.
Sa interview naman sang Bombo Radyo kay Vicente Araneta, magulang sang biktima, iya ginpahayag nga yara man siya sa kwarto sang natabo ang insidente apang naghingagaw siya sang paglumpat sa bintana sa kahangawa nga isunod siya nga tiruhon sang mga lalaki.
Suno kay Vicente, mabukod kag mataas ang lalaki nga nagluthang sa iya manghod.
Ginpahayag ni Vicente nga posible may kaangtanan sa daan nga record sang iya manghod ang pagpangluthang apang nagpamalibad na siya nga magdetalye kun ano ang iya ginatumod nga record.
