Nangin maragtason ang ginhiwat nga 51st Metro Manila Film Festival kahapon sang gab-i, sa ginpatigayon nga Gabi ng Parangal sa Makati.
Ini matapos nga nakuha sang pelikula nga “I’mPerfect” ang Best Picture award, samtang ginpasidunggan si Krystel Go bilang “Best Actress” sa iya papel sa pelikula nga nagasentro sa istorya sang mga young adults nga may Down syndrome.
Nakuha naman sang comedian nga si Vice Ganda ang iya labing-una nga pasidungog sa MMFF sang iya nakuha ang “Best Actor award” para sa “Call Me Mother” sini nga pelikula.
Nangin madinalag-un naman nga ginpasidunggan si Tom Rodriguez bilang Best Supporting Actor para sa pelikula nga “Unmarry”, si Odette Khan bilang Best Supporting Actress para sa “Bar Boys: After School” nga pelikula, kag si Lucas Andalio bilang Best Child Performer para sa “Call Me Mother”.
Gindala naman pauli nanday Jeffrey Jeturian ang Best Director para sa pelikula nga “Unmarry”, nga ginhingadlan man nga 2nd Best Picture, samtang ang Manila’s Finest kag Call Me Mother ang ginpasidunggan bilang 3rd Best Picture.
