Ginalauman kag balantayan ang mas madinuagon nga 52nd Iloilo-Guimaras Paraw Regatta Festival subong nga tuig.
Sa interview sang Bombo Radyo kay Dr. Roberto Somosa, Chairman sang Sailing Events sa Paraw Regatta, iya ginpahayag nga nagpakig-angot na sila sa pila ka safety authorities kaangay sang Philippine Coast Guard agud maghatag sang impormasyon sa coastal communities kaangot sa gamiton nga race route.
Suno kay Somosa, ang aktibidad ang magapakita sang pinasahi nga sailing event, kon sa diin, maga-traverse ang mga tagpumalasakop sa ginabanta 30 kilometros halin sa Villa Beach padulong sa Guimaras kag pabalik.
Ginhatagan man sini sang importansya ang “layag”, nga amo ang may duag sang nagkalain-lain nga pinta nga nagapakita man sang laragway kag sang artistry sang mga Ilonggo.
Ginlaragway man sini nga ang mga Paraw ang ang daw kaangay sang “alibangbang sa tunga sang dagat” nga nagapakita sang mainuswagon nga maritime history.
May bag-o man nga aktibidad ang balantayan, kag ini amo ang Slalom Race nga mahimo mangin isa ka kompetisyon kon malab-ot ang numero sang mga magapasakop.
