Nagdangat sa 54 ka journalists sa bilog nga kalibutan ang ginpangpatay subong nga tuig samtang nga nagahimo sang ila obligasyon nga kaangot sa ila propesyon.
Base sa annual report sang Reporters Without Borders (RSF) nga isa ka press freedom non-government organization, ang Israeli Army amo ang may kahimuan sa pagpatay sa 18 sa sini nga mga biktima kun sa diin ginaalegar 16 ang napatay sa Gaza kag duha sa Lebanon.
Suno pa sa organisasyon, ang Palestine amo ang nangin pinaka-delikado nga lugar para sa mga taga-media nga may mas mataas nga death toll ipaanggid sa bisan diin nga pungsod sa nagligad nga lima ka tuig.
Naka-file naman ang organisasyon sang apat ka reklamo sa International Criminal Court (ICC) bangud sa ginaalegar nga “war crimes” nga gin-komiter sang military sang Israel batok sa journalists.
Gindugang pa sa report nga halin sang nagsugod ang Gaza war sang Oktubre 2023, may masobra 145 journalists nga napatay kun sa diin 35 ang naga-trabaho sang tion nga ginbawian sang kabuhi.
Ginlaragway ini nga numero nga “an unprecedented bloodbath.”
Sa separado nga report sang International Federation of Journalists (IFJ), gin-report nga 104 journalists ang napatay sa 2024 kag masobra tunga ang halin sa Gaza.
Nahibaluan nga lain-lain ang numero nga gina-uyatan sang duha ka organisasyon bangud sa lain-lain man nga methodologies sa pag-isip sang patay.
Nahibaluan nga ang nagasunod sa Gaza bilang pinakamakamamatay nga lugar para sa journalists subong nga 2024 amo ang Pakistan nga may pito nga napatay; kag ang Bangladesh kag Mexico nga may tag-lima.
