Antes ang selebrasyon sang World Toilet Day, ginpahamtang sang Department of Health (DOH) kag Zero Open Defecation (ZOD) Team nga 54% ukon 98 sa masobra 180 ka barangay sa Iloilo City ang verified kag validated na bilang compliant sa ZOD program.
Ang programa, nga gin-umpisahan tatlo ka tuig ang nagligad nga nagatinguha nga malikawan ang open defecation kag mapalapnag ang paggamit sang husto kag malimpyo nga kasilyas.
Sa interview sang Bombo Radyo kay Jennifer Christie Avenir, Chief sa Environmental Sanitation Division, iya ginpahayag nga kinahanglan matuman ang Level 1 compliance — paggamit sang kasilyas, wala sang open defecation, kag wala sang exposed feces ukon diapers sa palibot.
Padayon nga ginapadasig sang DOH ang mga barangay officials nga mag-apply para sa ZOD assessment, kag target nila ang full compliance sa masunod nga tuig. Apang ang pinakamabudlay nga bahin amo gihapon ang mga coastal barangay, kun diin madamo pa ang nagapamuhin kag nagapangihi sa baybayon.
Gina-edukar man sang ahensya ang pumuluyo bahin sa risgo sang acute gastroenteritis, ilabi na kun may exposed feces kag basura sa palibot.
Padayon ang ZOD Team sa validation agud masiguro nga tanan nga barangay sa syudad mangin fully compliant sa programa.
