ILOILO CITY–Nagdangat sa ginabanta 300,000 pesos ang balor sang iligal nga druga nga nakuha sa isa ka durugista nga tubero sa buy bust operation nga ginpatigayun sa Brgy. Burgos Mabini, La Paz, Iloilo City.
Ang nadakpan amo si Carl Ellehcir De Guzman, 28 anyos pumuluyo sang Montinola Jaro Iloilo City.
Sa Interview sang Bombo Radyo kay Police Senior Insp. Kenneth Bermejo,Regional Drug Enforcement Unit of the Police Regional Office 6 , ginpahayag sini nga madugay na ginabantayan si De Guzman tubtob nadakpan sa buy bust operation.
Sa pag-usisa, natukiban nga halin sa Manila ang supply sang iligal nga druga ni De Guzman.
Gina-repack naman ang druga sa La Paz kag ginadeliver sa mga kaiping nga distrito.
Nakuha kay De Guzman ang 2, 200 pesos nga buybust money, duha ka magagmay nga sachet nga nagabalor 1,100 pesos ang isa, isa ka dako nga sachet sang ginadudahan shabu nga nagabalor sang 300,000 pesos, kag 63 ka bilog nga unused plastic sachet.
Nagapangatubang si De Guzman sang kaso nga paglapas sa RA 9165 ukon Comprehensive Dangerous Drugs Act.