GUIMARAS – Pilason nga ginpadangat sa ospital ang isa ka babaye matapos nga mabungguan sang tricycle nga ginamaneho sang menor de edad sa Igdarapdap, Nueva Valencia, Guimaras.
Ang biktima ang ginkilala nga si Gloria Gallarde, 55 anyos samtang ang menor de edad naman amo si alyas Bryle, 14 anyos.
Sa interview sang Bombo Radyo kay Loddie Gatuteo, ang nakakita sa aksidente, iya ginpahayag nga mabakal lamang kuntani sa tyangge si Gallarde apang sa iya nga pagtabok a dalan, gilayon siya nga nabungguan sang tricycle nga ginamaneho ni Bryle.
Suno kay Gatuteo, wala nagasakay sa motorsiklo ang menor de edad sa baylo yara ini mismo sa sulod sang side car samtang isa lamang ka kamot ang nagamaneho.
Dugang pa sang natungdan, ang ginhimo ni Bryle ang kaangay nga tripping ukon pasikat lamang.
Sa subong, padayon nga ginabulong sa ospital ang biktima bangud nakaangkon ini sang pilas sa ulo kag iban pa nga bahin sang iya nga lawas.//
