ILOILO– Nagdangat sa 55 ang nadakpan sa ginpatigayon nga Anti-Illegal Gambling Operations sa syudad sang Iloilo.
Sa Police Station 1, nagdangat sa 18 ang nagkaladakpan, 12 sa Police Station 3, siyam sa Police Station 4, siyam sa Police Station 5 kag pito sa Police Station 6.
Sa interview sang Bombo Radyo kay Iloilo City Police Office Spokesperson Police Captain Shella Mae Sangrines, iya ginpahayag nga umpisa sang nagsugod ang Enhanced Community Quarantine, nakapatigayon sila sang 14 ka Anti-illegal Gambling operations nga nagresulta sa pagkadakop sang 55 ka persona.
Suno kay Sangrines, nalakip sa mga nagkaladakpan amo ang mga benepisyaryo sang Social Amelioration Program kag isa mga rason kun nga-a ginatutukan ang Anti-Illegal Gambling Operations amo nga mapahangop sa publiko nga ang bulig halin sa gobyerno ang dapat nga gamiton sa husto.
Kalabanan sa mga nadakpan ang ginpasakaan sang kaso nga paglapas sang Presidential Decree 1602 ukon ang Anti-Illegal Gambling Act.
