Nagdangat na sa 55 ang na-report nga patay bangud sa mabaskog nga pag-ulan kag lapnagon nga pagbaha sa pila ka lugar sa southern China nga nagresulta man sa pagbakwit sang linibo ka mga tawo.
Suno sa Chinese state media, halin pa sang Hunyo 9 ang recorded nga nagkalamatay bangud man sa natabo nga mudslides kag flash floods.
Natam-an ang syudad sang Meizhou sa probinsya sang Guangdong kun sa diin 47 gid ang nagtaliwan nga ginaangot sa paglapaw sang tubig sa mga suba sa Songyuan kag Shiku.
Nahibaluan nga ang southern Guangdong province ang makabig nga economic powerhouse kag puluy-an sang 127 million ka mga tawo apang masami nga ginabaha sa kada pag-abot sang Abril tubtub Septyembre.
Sang nagligad nga adlaw, magluwas nga 10,000 ang gin-evacuate sa Meizhou, nagdangat man sa 130,000 ang nautdan sang suplay sang kuryente kag ginpasaka man ang flood control emergency response sa Level-I. Ang flood control emergency response system sang China ang may yara sang apat ka lebel kag ang Level-I amo ang ginakabig nga most severe.
Sa kaiping nga probinsya sang Fujian naman na-rekord ang walo ka iban pa nga casualties.
Maragtason ini nga hitabo sa China bangud base sa na-report sang state media sang Huwebes, ang pagbaha sa popular tourist destination nga Lijiang River amo ang pinakamalala halin sang 1998.
Sa bahin ni Chinese leader Xi Jinping, nagpanawagan ini para sa all-out efforts sang response teams agud masigurado nga indi na madugangan ang numero sang patay kag ang halit sa mga propiedad sa amo nga pungsod.
(Photo: Agence France-Presse)
