Indi magnubo sa 20 ka mga establisyemyento komersyal ang ginsirado sa Barangay Bangga Bante, Zarraga, Iloilo matapos naglatnanay sa COVID-19 ang mga vendor ukon manugbaligya.
Sa interview sang Bombo Radyo kay Punong Barangay Nelida Octaviano, iya ginpahayag nga nag-ugat ang paglatnanay sang virus sa isa ka manugbaligya nga gin-atake sa tagipusuon kag natukiban nga positibo ini sa COVID-19.
Matapos ang contact tracing, kag asud-asud nga swab testing, nagsaka na subong sa 58 ang numero sang mga nagpositibo sa virus.
Suno kay Octaviano, padayon subong nga gina-monitor ang kondisyon sang mga pasyente sa diin humalin pa sang nagligad nga semana, nakasirado na ang halos tanan nga baligyaan.
Samtang hugot naman nga ginapatuman ang border checkpoints sa Barangay Bangga Bante, Zarraga, Iloilo.
Sa interview sang Bombo Radyo kay Barangay Tanod Vicente Labayno, iya ginpahayag nga wala ginapahanugutan ang mga pumuluyo nga makasulod sa lugar kasunod sang padayon nga pagsaka sang COVID-19 cases.
Sirado man ang tanan nga essential establishments rason nga gina-abisuhan ang tanan nga magdiretso na lang sa banwa sang Zarraga agud makabakal sang kinahanglanon.
Indi pa man mapat-od sang natungdan kun tubtob san-o ang pagsirado sang mga border sa lugar.
