Patay ang 59-anyos nga lalaki matapos nalumos sa dagat sa Sitio Tuburan, Barangay San Salvador, Banate, Iloilo kadungan sang Byernes Santo, Abril 18.
Ang biktima amo si Rene, residente sang Barangay Cawayan, Pototan, apang nagbisita sa iya bata sa San Salvador, Banate.
Sa interview sang Bombo Radyo kay Police Captain Randy Lambungan, hepe sang Banate Municipal Police Station, iya ginpahayag nga naka-inum-inom ang biktima antes ang insidente.
Suno kay Lambungan, naligo ang biktima, apang natalupangdan sang ulihi nga nagalutaw na kag nagakulob ang lawas sini kag nagabula ang baba.
Gilayon nga gindala ang biktima sa Barotac Viejo District Hospital, apang gindeklarar nga dead on arrival.
Magluwas sa sini nga insidente sa Banate, may isa man ka 13-anyos nga bata nga lalaki nga nalumos sa busay sa Barangay Cahigon, Calinog, Iloilo kadungan man sang sini nga balaan nga adlaw.#
(*Not the actual photo)
