ILOILO CITY–Patay ang 5 ka bulan nga lapsag matapos ginlasak sang depampasahero nga jeep sa Zone 8, Brgy. Calumpang, Molo, Iloilo City.
Ang lapsag nga isa ka baby girl ang ikaduha nga bata sang iloy nga si Mary Joy Bangcas, 27 anyos Zone 10, Brgy. Calaparan, Arevalo, Iloilo City.
Sa interview sang Bombo Radyo sa utod ni Mary Joy, iya ginpahayag nga naghalin ang mag-iloy sa Brgy. Calumpang bangud nga ginpahilot ang lapsag.
Dugang pa sang Tiyo, nahulog ang mag-iloy nga nagapungko sa front seat sang ginasakyan nga jeep matapos nga hinali lang nga nagliko salakyan bangud sa hinali nga pagtabok sang isa ka tigulang nga babaye.
Bangud sa mabaskog nga impact, nabuy-an sang iloy ang lapsag kag nalasak gid sang jeep.
Samtnag, arestado ang driver sang depampasahero nga jeep nga naglasak sa lima ka bulan nga lapsag Zone 8, Brgy. Calumpang, Molo, Iloilo City.
Ang driver ang ginkilala kay Melbert Guiao, 30 anyos sang Zone 10 Brgy. Calaparan, Arevalo, Iloilo City.
Sa interview sang Bombo Radyo kay PO2 Louie James Abantao, imbestigador sang Molo Police Station, iya ginpahayag nga nag-angkon sang gasgas sa tiil kag sa tuo nga abaga kag bukol sa ulo ang iloy nga si Mary Joy Bangcas samtang nalasak naman Jeep ang ulo sang lapsag.
Nakadepende naman sa pamilya ni Bangcas kun magapasaka sang kaso ukon indi batok sa driver sang depampasahero nga jeep.