ILOILO CITY- Napun-an sang inspirasyon suno sa isa ka kongresista si Presidente Rodrigo Duterte sa paghatag sang mensahe sa bug-os nga pungsod sa ginpatigayun nga State of the Nation Address.
Sa interview sang Bombo Radyo kay 5th District Congressman Raul ‘Boboy’ Tupas, iya ginpahayag nga inspired ang Presidente bangud sa mataas sini nga trust rating kag sa resulta sang nakaligad nga eleksyon sa diin kalabanan sa iya mga kaalyado ang nagdalaog.
Nalipay man suno sa iya si Duterte bangud nangin maayo ang iya performance bilang pinuno sang pungsod sa nakaligad nga tatlo ka tuig.
Samtang nalipay man siya suno kay Tupas nga natalakay sang Presidente ang paghatag sang mataas nga sweldo sa mga manunudlo kag mga nurses pinaagi sa bag-o nga salary standardization.
Nalakip man suno kay Tupas ang tuhoy sa implementasyon sang Train 2 ukon ang Tax Reform for Attracting Better and Higher Quality Opportunities (TRABAHO) bill nga nagapanubo sang corporate income taxes sang mga kompaniya.
Magluwas sini suno sa natungdan, napakot man sini nga ipatpat sang presidente ang pagpabalik sang death penalty sa mga heinous crimes.
Importante man suno kay Tupas nga naistoryahan ang pagtukod sang Department of Water Resources bangud kinahanglan ini indi lang sa Metro Manila kundi sa mangin sa nagkalain-lain nga probinsya sa Pilipinas agud masolusyunan ang problema sa tubig.
Nalipay man si Tupas bangud sa paglakip sang mandatory Reserve Officers Training Corps (ROTC) sa gin-istoryahan sa diin siya ang author sang nasambit nga hagna kag nagalaum nga may counterpart ang iya hagna sa senado.
Sa pihak nga bahin may kaangtanan sa nangin joke sang Presidente tuhoy sa linog nga kuntani sa kongreso ini magluntad, ginpahayag ni Tupas nga nagakadapat tanan sa ila ang magbag-o.
Nagakadapat man nga mangin relevant , responsive kag reliable ang kongreso sa kun ano ang luyag sang mga pumuluyo.
Luyag man ni Tupas nga bag-uhon ang panulok sa ila sang mga tawo pinaagi sa pagpasar sang layi nga may impact sa mga pumuluyo.
Luyag man nila nga himuon ang kongreso bilang house of the people.
Ginhatagan man sini sang score nga 8.5 ang SONA sang Presidente.
