Ginaduso ni 5th District Representative Binky April Tupas ang pagtukod sang separado nga Schools Division sa Northern Iloilo.
Sa interview sang Bombo Radyo, ginpahayag sang representante nga ang Schools Division of Iloilo amo ang ikatlo sa pinakadako sa bug-os nga pungsod. May ara ini sang ginabulubanta 20,000 ka mga empleyado, rason nga suno sa iya, “physically impossible” nga matutukan ang 1,174 ka mga eskwelahan.
Dugang pa niya, ang pagtukod sang Schools Division of Northern Iloilo mangin pabor gid para sa mga pumuluyo sa norte, ilabi na gid sa mga island schools.
Sa subong, wala pa sang pinal nga desisyon kun diin ibutang ang opisina sang nasambit nga schools division bangud yara pa lamang ini sa 2nd Reading sa Kongreso kag ginatinguhaan nga maistorya ang Chair sa Committee on Ways and Means agud nga mapondohan.
Nangabay man si Tupas kay Senator Bam Aquino, chair sang Senate Committee on Education, nga mag-file sang counterpart bill sa Senado agud mapabakod ang pagtukod sang separado nga Schools Division sa Northern Iloilo.
