Ginalauman na sang Philippine Coast Guard (PCG) Iloilo nga magatuga sang huol kag pila ka problema ang adjustment sa schedule sa byahe sang mga sakayang pandagat sa Guimaras.
Nahibaluan nga nasaad sa Executive Order number 24 nga ginpapanaog ni Guimaras Governor Samuel Gumarin, epektibo umpisa subong nga adlaw, Hunyo 7, limitahan sa las 6 sa aga tubtob las 3 sang hapon ang byahe sang mga Roll-On Roll-Off vessel kag Fiber-modernized boats.
Sa exclusive interview sang Bombo Radyo kay Commander Edison Diaz, pinuno sang PCG Iloilo, iya ginpahayag nga magluwas sa mga cargo, indi na makabyahe ang tanan nga pasahero sa Guimaras pag-abot sang las 3 sang hapon.
Suno kay Diaz, ginalantaw nila nga madamo sang mangin isyu sa bag-o nga schedule sang byahe sang mga sakayang pandagat bangud may mga pumuluyo nga nagatrabaho sa syudad sang Iloilo nga las 4 ukon las 5 pa sang hapon ang out.
Apang ginpahayag ni Diaz nga wala man sila sang may mahimo diri, kag nagakadapat nga magpaminsar kag maghimo man sang inisyatibo ang mga pumuluyo agud indi mapaslawan sa pagsunod sa pagsulundan.
Ginpasigurado man sang natungdan nga igapatuman nila sang istrikto ang nasaad sa executive order 24 kag ginapangabay ang tanan nga magkooperar.
Samtang, naghingyo naman ang Buenavista Motorbanca Owners and Sailors Association (BAMOSA) sa Maritime Industry Authority (MARINA) nga dulaon na lamang ang bag-o nga schedule sang byahe sang mga sakayang pandagat sa Guimaras.
Sa interview sang Bombo Radyo kay Captain Neri Tejing, presidente sang BAMOSA, iya ginpahayag nga nagpadala na sila sang request sa MARINA nga bawion ang schedule sang sakayang pandagat nga nagalimita sa las 6 sa aga tubtob las 3 sang hapon sang byahe sang mga Roll-On Roll-Off vessel kag Fiber-modernized boats.
Suno kay Tejing, nagakabalaka sila sa huol nga matuga sini sa mga pasahero nga luyag man kuntani nga maghingagaw pauli kada hapon.
Panawagan sang natungdan, kuntani hatagan man sang nagakaigo nga igtalupangod ang mga mahimo maapektuhan nga pasahero sa bag-o nga schedule sang sakayang pandagat.
