Isa sa pinaka-memorable nga mga tinion sang kita yara sa elementarya amo ang paghampang kaupod sa aton damo-damo nga classmates.
Na-imagine mo bala ang imo kaugalingon kun halimbawa, absent ang imo nga mga friends kag playmates kag ikaw lang isa ang nag-eskwela? Kasubo, indi bala?
Sa isa ka distrito sa Japan, Grade 1 pa lang kag anum ka tuig ang edad sang bata nga si Nozomi Fujioka apang naagaw na sini ang atensyon sang bilog nga faculty sa eskwelahan!
Ini bangud isahanon lang ini nga estudyante nga nag-enrol sa Grade I sa Yanagidani Elementary School sa ila nga lugar.
Bisan isahanon lang si Nozomi, malipayon siya nga gin-abi-abi sang eskwelahan paagi sa isa ka entrance ceremony nga isa ka tradisyon sa Japanese schools.
Sang 2021 tubtub sang 2023, wala gid sang bisan isa nga nag-enroll sa Grade 1 amo gani nga ginsirado na lang ang eskwelahan sang nagligad nga tuig bangud wala man sang enrollees.
Ina bangud ang Yanagidani district sa banwa sang Kumakogencho ang may yara lamang sang 540 populasyon, kag sa sini nga mga tawo, gamay lang gid ang mga bata.
Isa sa pinakamalipayon sa pag-eskwela ni Nozomi amo ang iya amay nga si Tsuyoshi nga ginbata kag nagdaku gid sa Yanagidani, lugar nga ginbayaan na sang iban bangud nagakadto ang iban nga mga residente sa mas dalagku nga syudad para sa mas daku nga academic kag professional opportunities.
Sa bilog nga eskwelahan, apat sanday Nozomi kag siya ang agot apang wala ini nahadlok bangud friendly man ang iban nga kabataan nga yara sa mas mataas nga grade level.
Isa man sa naplanuhan sang eskwelahan amo nga tingubon ang mga bata sa tion sang Physical Education ukon PE para mas mangin masadya kag makapartisipar ang mga ini sa group games.
