Arestado ang anum na naman ka Chinese nationals kag isa ka Pinoy sa isa ka pribado nga isla sa Zambales bangud sa ginaalegar nga pagpatigayon sang surveillance activities malapit sa West Philippine Sea.
Marso 9 sang nadakpan ang mga suspek sa hot-pursuit operation sa Grande Island nga nahamtang sa sulod sang Subic Bay Freeport Zone.
Ginpatigayon ang operasyon kasunod sang impormasyon nga nakuha sang mga opisyal sang militar kaangot sa posible nga “covert intelligence, surveillance and reconnaissance operations” nga ginahimo sang “affiliated members” sang Chinese Communist Party-United Front Work.
Sang ginpresentar na sila sang National Bureau of Investigation (NBI) sa publiko, ginhingadlan sila nga si He Peng, Xu Xining, Ye Tianwu, Ye Xiaocan, Dick Ang kag Su Anlong.
Kaupod nila nga gindakop ang Pilipino nga si Melvin Aguillon nga amo ang nagserbe nga bodyguard. Nagapanindugan ini nga wala sila sang ginhimo nga covert activities kundi nagapangisda lamang.
Pahayag ni Van Homer Angluben, director sang NBI Cybercrime Division, nagpakuno-kuno pa ang mga Chinese bilang mga manugpangisda nga nagapaliwa-liwa lamang, apang sang tion sang ila surveillance, nagpalupad na sila sang drone kun may maglabay nga barko.
Nakumpiskar sa ila ang gadgets nga may unod nga mga laragway kag videos sang Philippine kag American naval assets, mga dokumento nga naka-lista sang mga oras kag petsa sang paghalin kag pag-abot sang naval fleet sa Port of Subic, kag mga peke nga tax documents.
Ginpaidalom ang mga suspek sa inquest proceedings sa Bataan, nagapangatubang sang kaso nga espionage, falsification of documents kag concealment sang ila matuod nga mga pangalan.
Ang Pinoy naman nga kahimbon ang mangatubang man sang kaso nga paglapas sa Omnibus Election Code bangud sa iligal nga armas nga iya ginahuptan.
Ginpahayag man sang otoridad nga isa ka “strategic vantage point” ang Grande Island bangud makit-an halin sa area ang klaro nga view sang key sea lanes sa West Philippine Sea lakip na ang Panatag (Scarborough) Shoal.
